Chuir an tÚdarás Póilíneachta agus Sábháilteachta Pobail an cruinniú poiblí is déanaí dá chuid le Coimisinéir an Gharda Síochána ar siúl in Ionad Oideachais agus Imeachtaí Richmond i mBaile Átha Cliath Déardaoin an 31 Iúil.
I dtús an chruinnithe, rinne an tÚdarás agus Drew Harris, Coimisinéir an Gharda Síochána, plé ar an gcomhairliúchán poiblí ar na Tosaíochtaí Póilíneachta 2026–2028, rud a seoladh idir mí na Bealtaine agus mí an Mheithimh i mbliana.
Tharraing comhaltaí den Údarás ceisteanna anuas freisin faoi roinnt topaicí tábhachtacha, lenar áiríodh bainistíocht feidhmíochta daoine aonair.
Rinneadh é sin faoi threoir an athbhreithnithe neamhspleách a rinneadh le déanaí ar phóilíneacht ar bhóithre. Choimisiúnaigh an Garda Síochána an t-athbhreithniú agus fuair an tÚdarás é i mí an Mheithimh.
Leagtar amach sa tuarascáil neamhspleách sin léargas gruama ar an neamhréireacht shuntasach atá ann maidir le táirgiúlacht agus leibhéal gníomhaíochta chomhaltaí na póilíneachta ar bhóithre.
Ina dhiaidh sin, bogadh an cruinniú ar aghaidh chun plé a dhéanamh ar fhreagairt an Gharda Síochána do ghlaonna seirbhíse agus ar phleanáil imeachtaí mórscála, lena n-áirítear Uachtaránacht an Aontais Eorpaigh sa dara sé mhí den bhliain 2026.
Ba í mí-úsáid baile an mhír dheireanach a pléadh, agus díríodh sna ceisteanna ar an gcéad teagmháil a bhíonn ag íospartaigh leis an nGarda Síochána agus ar an bhfreagairt ó chomhaltaí den Gharda Síochána do thuairiscí mí-úsáide.
Sa chruinniú deiridh a bhí aige leis an Údarás, rinne Drew Harris, Coimisinéir an Gharda Síochána, a mhachnamh ar a sheacht mbliana sa ról agus ar na dúshláin amach anseo don phóilíneacht, sula ndearna sé comhghairdeas le Justin Kelly, a chomharba.
Beidh an chéad chruinniú poiblí eile idir an tÚdarás Póilíneachta agus Sábháilteachta Pobail agus Justin Kelly, Coimisinéir an Gharda Síochána atá ag teacht isteach, ar siúl Déardaoin an 25 Meán Fómhair.