Tá imní mhór ar an Údarás Póilíneachta agus Sábháilteachta Pobail faoina bhfuil i dTuarascáil Crowe, rud a pléadh leis an gCoimisinéir go poiblí an 31 Iúil agus go príobháideach an 26 Meitheamh.

Cé go bhfuil díriú ar an bPóilíneacht ar Bhóithre ann sa Tuarascáil, baineann ábhar imní an Údaráis den chuid is mó le bainistíocht feidhmíochta éifeachtach a bheith in easnamh ar fad sa Gharda Síochána. Is mór an náire nach bhfuil aon mhodh ag eagraíocht a bhfuil thart ar 18,000 duine inti chun drochfheidhmíocht a bhainistiú go héifeachtach, agus teastaíonn gníomhaíocht láithreach ina leith sin.

Dúirt Elaine Byrne, Cathaoirleach:

“Comhlíonann formhór mór na nGardaí a ndualgais ar chaighdeán an-ard agus déanann siad a seacht ndícheall seirbhís póilíneachta nua-aimseartha den chéad scoth a chur ar fáil do mhuintir na hÉireann.

“Mar is féidir a fheiceáil sa tuarascáil seo, áfach, tugann roinnt díobh neamhaird fhollasach ar an bpost agus ar na feidhmeanna a ghabhann leis. B’eol dóibh go raibh athbhreithniú á dhéanamh orthu mar chuid den tuarascáil seo ar an bPóilíneacht ar Bhóithre ach, dá ainneoin sin, bhí siad an-naimhdeach i leith a gcuid oibre a dhéanamh.

“Tá imní mhór orainn go raibh an chuma air go raibh eagla ar roinnt bainisteoirí roimh fheidhmíocht a bhainistiú.

“Fáiltímid roimh an bhfíric gur ghníomhaigh Drew Harris, Coimisinéir an Gharda Síochána, agus a chomhghleacaithe sinsearacha de bhun na n-ábhar imní a chuir comhalta den Gharda Síochána in iúl dó. Is léiriú é sin ar athrú cultúrtha laistigh den eagraíocht, áit a bhfuiltear ag iarraidh aghaidh a thabhairt ar fhíricí míchompordacha seachas iad a choimeád faoi choim.

“Táimid ag súil leis an gcur chuige sin a bheith ag leanúint ar aghaidh faoi Justin Kelly, Coimisinéir nua an Gharda Síochána. Beidh an tÚdarás ag bualadh leis chun na saincheisteanna sin agus nithe eile póilíneachta a phlé ag ár gcéad chruinniú poiblí eile an 25 Meán Fómhair.”