Tá áthas ar an Údarás Póilíneachta agus Sábháilteachta Pobail (PCSA) na Tosaíochtaí Póilíneachta le haghaidh an Gharda Síochána don tréimhse 2026-2028 a fhoilsiú.
Is iad seo na trí Thosaíocht:
Obair i gComhpháirt chun Freastal ar Riachtanais an Phobail;
Seirbhís Chomhsheasmhach Thacúil Ardchaighdeáin a Sholáthar; agus,
Acmhainní Túslíne a Chumasú.
Policing Priorities 2026-2028_Gaeilge
Leis na Tosaíochtaí seo, leagtar síos cé na nithe ar cheart don Gharda Síochána an aird is mó a thabhairt orthu chun na seirbhísí póilíneachta a chuirtear ar fáil do phobail a fheabhsú agus chun a sábháilteacht a chinntiú. Is ann do phríomhréimsí sonracha dírithe agus do phríomhghníomhartha sonracha faoi gach ceann de na trí Thosaíocht, ina leagtar amach cén chuma a bheidh ar rath don Gharda Síochána chun torthaí a bhaint amach i gcomparáid leo.
Áirítear leis sin príomhfhorbairtí agus príomhfheabhsuithe i réimsí ar a nós seo a leanas:
Póilíneacht Pobail, agus acmhainní a chur ar fáil d’Aonaid Rialta chun feabhas a chur ar sheirbhísí agus ar infheictheacht;
Freagairt, i gcomhar le comhpháirtithe, do ghéarchéimeanna meabhairshláinte, d’imeaglú a bhaineann le drugaí, agus do shaincheisteanna eile sábháilteachta pobail;
A chinntiú go leagtar díriú ar na seirbhísí póilíneachta a sholáthraítear d’íospartaigh, do leanaí agus do phobail a bhfuil leochaileacht mhéadaithe acu, agus ar chaidreamh a dhéanamh leo; agus,
An córas agus na struchtúir atá i bhfeidhm chun tacú le fórsa saothair an Gharda Síochána seirbhísí póilíneachta a sholáthar go héifeachtach do phobail agus chun a chur ar a chumas déanamh amhlaidh.
Leag PCSA, mar chomhlacht formhaoirsiúcháin neamhspleách, na Tosaíochtaí seo agus na réimsí sonracha le haghaidh feabhais síos, tar éis gníomhaíocht shuntasach rannpháirtíochta sa bhliain 2025.
I gcomhréir leis an reachtaíocht, cuireadh faoi bhráid an Aire Dlí agus Cirt, Gnóthaí Baile agus Imirce iad ansin lena cheadú a fháil agus tugadh do Choimisinéir an Gharda iad. Ceanglaítear ar an gCoimisinéir a chinntiú go bhfuil Plean Straitéiseach an Gharda Síochána 2026-2028 agus na Pleananna Seirbhíse Bliantúla thar an tréimhse ag teacht leis na Tosaíochtaí seo.
Ag labhairt di faoi sheoladh na dTosaíochtaí, dúirt Helen Hall, Príomhfheidhmeannach PCSA:
“Is é atá i seoladh na dTosaíochtaí Póilíneachta reachtúla seo ná garsprioc thábhachtach chun soiléire agus díriú a sholáthar ar na réimsí póilíneachta ar gá don Gharda Síochána díriú orthu sna trí bliana atá romhainn. Sin iad freisin na príomhréimsí a ndíreofar ár ngníomhaíocht formhaoirsiúcháin orthu, chun an dul chun cinn a bheidh déanta ag an nGarda Síochána a mheas.
Bhí barúlacha agus tuairimí na ndaoine a sholáthraíonn agus a fhaigheann seirbhísí póilíneachta ina gcuid ríthábhachtach de na Tosaíochtaí seo a fhorbairt. Ba mhaith linn ár mbuíochas a ghabháil arís leis na 4,000 duine, beagnach, a ghlac páirt sa suirbhé ar líne i mí na Bealtaine agus mí an Mheithimh 2025. Ba mhaith linn freisin buíochas ar leith a ghabháil leis na céadta daoine, idir bhaill foirne de chuid an Gharda Síochána, ionadaithe pobail, agus dhaoine eile, a thug a gcuid ama chun bualadh linn go pearsanta agus labhairt linn faoi conas feabhas a chur ar na seirbhísí póilíneachta a sholáthraítear do gach pobal. Bhí bhur gcuid moltaí agus léargas thar a bheith luachmhar agus muid ag forbairt na dTosaíochtaí críochnaitheacha.
Táimid ag súil le caidreamh a dhéanamh ar an gcaoi chéanna le raon leathan geallsealbhóirí agus muid ag déanamh formhaoirsiú agus measúnú ar an dul chun cinn i gcomparáid leis na Tosaíochtaí.”
Dúirt an tAire Jim O’Callaghan, an tAire Dlí agus Cirt, Gnóthaí Baile agus Imirce:
“Tá córas ceartais atá nua-aimseartha, éifeachtúil agus trédhearcach á thógáil agam. Léirítear é sin sa chóras formhaoirsiúcháin agus rialachais a thug mé isteach le tosach feidhme an Achta um Póilíneacht, Slándáil agus Sábháilteacht Pobail, 2024, i mí Aibreáin anuraidh.”
Conas a d’Fhorbraíomar na Tosaíochtaí seo
Soláthraíonn an Garda Síochána raon leathan seirbhísí don phobal, agus tá éilimh mhóra ann ar an eagraíocht. Ní féidir le gach rud a bheith ina thosaíocht, áfach, agus socraíodh na Tosaíochtaí seo i gcomhthéacs na nithe seo a leanas:
Na hacmhainní atá ar fáil don Gharda Síochána faoi láthair – lena n-áirítear comhaltaí agus baill foirne, airgeadas, agus teicneolaíocht, etc.;
An t-éileamh ollmhór póilíneachta a bheidh ar Éirinn nuair a bheidh Uachtaránacht Chomhairle an Aontais Eorpaigh aici sa bhliain 2026; agus,
An mhórthimpeallacht shochpholaitiúil agus eacnamaíoch.
Dá bhrí sin, b’eol do PCSA agus na Tosaíochtaí á bhforbairt aige go mbeadh roghanna deacra le déanamh. Bhíomar ag iarraidh, mar sin, cloisteáil go díreach ó phobail agus ó phearsana atá ag obair sa Gharda Síochána chun a fháil amach cé na nithe is mó ar mhaith leo go gcuirfí ar áireamh iad. Chun an méid sin a dhéanamh:
Reáchtálamar comhairliúchán poiblí ar líne a fuair 3,794 fhreagra;
Bhuaileamar le breis agus 400 ball foirne ar seirbhís de chuid an Gharda Síochána ar fud gach contae;
Rinneamar caidreamh le saineolaithe agus le hacadóirí atá ag obair i réimse na póilíneachta agus na sábháilteachta pobail; agus,
Chuireamar ceithre imeacht réigiúnacha ar siúl chun éisteacht go díreach le thart ar 100 grúpa geallsealbhóirí pobail.
Bhreithníomar an t-aiseolas fairsing ó na himeachtaí caidrimh sin, mar aon le faisnéis a bailíodh ón méid seo a leanas a dhéanamh: tosaíochtaí cosúla ó thíortha eile a bhreithniú; feidhmíocht an Gharda Síochána sna blianta beaga atá imithe thart a athbhreithniú; agus gníomhaíochtaí éagsúla eile a dhéanamh.
De bharr an phróisis sin, tá an tÚdarás Póilíneachta agus Sábháilteachta Pobail muiníneach go sainaithnítear sna Tosaíochtaí sin na príomhréimsí lena bhfeabhsú chun an méid seo a leanas a chinntiú:
Go gcuirfear feabhas ar an tseirbhís a chuirtear ar fáil do phobail sna háiteanna is mó a bhfuil feabhsuithe ag teastáil iontu;
Go gcuirfear ar chumas phearsana an Gharda Síochána an tseirbhís sin a sholáthar chomh maith agus is féidir leo; agus,
Go mbeidh siad réadúil agus indéanta freisin de réir na n-acmhainní atá ar fáil don Gharda Síochána.
Déanfaidh PCSA formhaoirsiú agus measúnú ar an dul chun cinn a bheidh déanta ag an nGarda Síochána ar na Tosaíochtaí seo a bhaint amach sna blianta atá romhainn.